Vit rokast nógv, bæði inni og úti. Tí er tað umráðandi, at barnið hevur klæði og skógvar, sum hóska til veðrið og árstíðina. Eisini er tað eitt gott hugskot altíð at hava tvey sett av skiftiklæðum á plássinum. Viðhvørt kann tað verða eitt sindur óruddiligt, tá børnini ofta sjálvi lata seg í og úr. Tí mæla vit til, at foreldur ella avvarðandi javnan rudda plássið hjá barninum fyri at halda skil á klæðunum, sum barnið hevur við á stovn.

Dagstovnurin við Stórheygg bjóðar blæur til øll børnini, sum ganga í vøggustovu. Tí er ikki neyðugt at keypa blæur við til vøggustovuna. um barnið brúkar blæu tá tað fer í barnagarð, skulu tey hava blæur við.

Í høvuðsheitinum siga vit, at børnini í vøggustovuni skulu sleppa at sova til tey vakna av sær sjálvum. Tað vil siga, at vit vekja ikki børnini. Vit vilja, at øll børnini hava ein góðan dagligdag í vøggustovuni. Tí er tað umráðandi at børnini m.a. eru væl svøvnt.

Hjá summum børnum kann tað kennast trygt og gott at hava onkra leiku við, sum tey kenna væl og eru góð við. Tí hava vit onga ávísa reglugerð, tá vit tosa um at hava leiku við á stovn. Heldur vilja vit mæla til, at foreldur ella avvarðandi tosa við starvsfólkini á stovuni, har barnið gongur, um tit hava ivmál ella spurningar hesum viðvíkjandi. Tað er tó gott at leggja sær í geyma, at leikur, sum koma við á stovnin, altíð eru undir egnari ábyrgd.

Á dagstovninum við Stórheygg hava vit øll matpakka við (um ikki onnur avtala er gjørd). Stovnurin bjóðar tó mjólk, frukt og millummála til øll børnini. Seinasta hósdag í hvørjum mánaða frá september til páskir bjóðar stovnurin eisini døgurða til øll.

Barnið er vælkomið at hava eitthvørt gott at bjóða hinum børnunum á stovuni, tá barnið hevur føðingardag.

Dagstovnurin við Stórheygg hevur føðingardag tann 2. mai og hesin dagurin verður sjálvandi eisini hátíðarhildin við øllum tí, sum har til hoyrir.

Umráðandi er, at børnini eru frísk og væl fyri, tá tey koma á stovn. Bæði fyri teirra egna besta, men eisini fyri ikki at smitta onnur við umfarssjúkum. Um barnið verður sjúkt á stovninum, so boða vit sjálvandi foreldrum ella avvarðandi frá skjótast gjørligt.

Í serligum førum ber til hjá starvsfólkum at geva barninum heiligvág, meðan barnið er á stovninum. Vinarligast boða stovuni hjá barninum ella leiðaranum frá, um tørvur er á hesum.

Summarfrítíð: Stovnurin er afturlatin fýra vikur um summarið. Tó skiftast stovnarnir í økinum um at hava summartilboð. Nærri kunning um hetta fæst við at venda sær til stovuna hjá barninum ella leiðaran á stovninum.

Ráðleggingardagar: Stovnurin hevur tveir ráðleggingardagar um árið. Tá hevur stovnurin ikki opið. Nærri kunning um hetta fæst við at venda sær til stovuna hjá barninum ella leiðaran á stovninum.

Jólafrítíð: Stovnurin er afturlatin í døgunum millum jól og nýggjár.

Harumframt er stovnurin afturlatin hesar dagar:

25. apríl Flaggdagur
2. Páskadagur
Dýri Biðidagur
Kr. Himmalsfaradagur
Hvítusunnufrítíð
Grundlógardagur, opið til kl 12

Á dagstovninum við Stórheygg hava vit fleiri siðir og tiltøk, sum vit eru so sera góð við. Hetta kann til dømis vera jól, páskir, føsta, mentunardagar og garðhugni. Hetta ger, at vit hvørt ár hava fleiri stuttlig og áhugaverd tiltøk á skránni. Tit fáa nærri kunning um hvørt tiltak frá stovuni, har barn tykkara gongur.

Viðhvørt henda smá óhapp á stovninum. Sum oftast hevur tað lítið upp á seg, men um vit meta, at ráðiligt er at fara á skaðastovuna, so boða vit sjálvandi foreldrum ella avvarðandi frá skjótast gjørligt. Tí er tað umráðandi, at telefonlistin, sum er á stovuni hjá barninum, altíð er dagførdur. Vinarliga sigið okkum frá beinanvegin, um tit skifta telefonnummar ella líknandi, sum er viðkomandi fyri stovnin.

Av og á fáa vit námsfrøðislesandi ella næmingar frá fólkaskúlanum í starvsvenjing hjá okkum. Tá koma tey inn á eina stovu og eru til arbeiðis saman við teim starvsfólkunum, sum annars eru á stovuni. Hetta plagar at verða ein stuttlig og gevandi tíð hjá bæði børnum og vaksnum.

Foreldraviðtalur eru um heystið. Her verða foreldur ella avvarðandi boðin til eina persónliga viðtalu saman við starvsfólkum á stovuni, har barnið gongur. Tit fáa nærri boð um hetta, tá tíðin er komin til tess. Hava tit fleiri børn á stovninum, so royna vit eftir besta førimuni at leggja viðtalurnar saman.

Um várið verður skipað fyri einum felags foreldrafundi fyri allan stovnin. Tá ber til at hitta hini foreldrini/avvarðandi og eisini at tosa við starvsfólkini á teim ymsu stovunum.

Fyri hvønn dagstovn og hvørja dagrøktarskipan í Føroyum (tó ikki sjálvsognarstovnar) skal veljast eitt foreldraráð, sum gevur leiðaranum ráð og vegleiðing. Endamálið við foreldraráðnum er sostatt at arbeiða fyri at bøta og styrkja um samstarvið millum heim, stovn og kommunu.

Í foreldraráðnum skulu vera 3-5 limir, sum verða valdir fyri tvey ár í senn. Fyri hvønn lim verður ein varalimur valdur og ráðið skal vera umboðað av foreldrum, sum hava børn á dagstovninum ella í dagrøktarskipanini. Tað eru foreldur, sum hava barn ella børn á stovninum, sum velja umboð til foreldraráðið.

Til ber at søkja um fríplass til dagstovnin við Stórheyg. Umsóknarskjal til hetta er at finna á heimasíðuni www.sunda.fo.

Eisini ber til at søkja um farloyvi til barnið, um tørvur er á hesum. Ynskiligt er, at farloyvi er galdandi fyri í minsta lagi seks mánaðir. Setið tykkum í samband við leiðaran á stovninum, um hetta er viðkomandi fyri tykkum.

Úrmelding av barninum skal boðast frá skrivliga ein mánaða áðrenn, at barnið gevst á stovninum. Uppsagnarfreistin er sostatt ein mánaði til ein 1. í mánaðinum.